Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi (MEMİM) tərəfindən təşkil olunmuş qarmon ixtisası üzrə ustad dərsi Yevlax şəhərində keçirilib.

Mərkəzi Aran Regional Mədəniyyət İdarəsinin dəstəyi ilə dekabrın 22-də Yevlax şəhər 1 nömrəli uşaq musiqi məktəbində keçirilən qarmon ixtisası üzrə ustad dərsində idarənin tabeliyində fəaliyyət göstərən Yevlax, Ağdaş, Göyçay, Kürdəmir, Ucar, Zərdab rayon və Mingəçevir şəhər musiqi və incəsənət məktəblərindən şagird və müəllimlər iştirak ediblər.

Ustad dərsi Azərbaycan Dövlət Mədəniyyət və İncəsənət Universitetinin Xalq çalğı alətləri kafedrasının müəllimi, dosent, Əməkdar artist Sərxan Abiyev tərəfindən aparılıb.

Tədbirdə iştirak edən MEMİM-in şöbə müdiri Əməkdar mədəniyyət işçisi Lalə Kərimova bildirib ki, dahi bəstəkar Üzeyir Hacıbəylinin 140 illiyinə həsr olunan ustad dərsinin məqsədi Mədəniyyət Nazirliyi sistemində fəaliyyət göstərən musiqi və incəsənət məktəblərində tədrisin səviyyəsinin yüksəldilməsinə töhfə verməkdir. Qeyd olunub ki, layihə şagirdlərin musiqi zövqünün zənginləşdirilməsi, onlara peşəkar vərdişlərin aşılanması, eləcə də müəllimlərin nəzəri və praktiki biliklərinin artırılması baxımından əhəmiyyət daşıyır.

Ustad dərsində pedaqoq şagirdlərin ifası əsasında tövsiyələrini verib, auditoriyanı maraqlandıran sualları cavablandırıb.

Sonda MEMİM tərəfindən tərtib edilən “Asəf Zeynallı. Seçilmiş əsərlər” kitabı məktəbin kitabxanasına hədiyyə olunub.