Azərbaycan Respublikası Mədəniyyət Nazirliyi
Azərbaycan xalqının coxəsrlilik tarixə malik mədəni irsi vardır. Onları qorumaq, mənimsəmək, təbliğinə və təşviqinə çalışmaq hər bir vətəndaşın borcudur. Azərbaycan mədəniyyətinin dünyaya inteqrasiyası nəticəsində tətbiqi və dekorativ sənət öz inkişafının yüksək mərhələsinə çatmışdır.Bu sənət bizə tarixi keçmişimizin köklərindən xəbər verən ən qiymətli xəzinədir. İnsanın məişətdə istifadə etdiyi əşyalar — qab-qacaq, mebel, parçalar, əmək alətləri, silah, geyim — zinət əşyalarıdır. Onların bəzədilməsi dekorativ-tətbiqi sənət növünə aiddir. Bu sənətdə istənilən obyekt naxışa çevrilə bilər.
Dekorativ-tətbiqi sənətin müxtəlif növləri mövcuddur: məsələn, mozaika (ala-bəzək saxsı parçalarından quraşdırılmış təsvir), oyma (ağac, daş, sümük üzərində oyularaq həkk olunmuş naxış), vitraj (şüşə üzərində çəkilmiş və ya şüşədən quraşdırılmış təsvir və ya naxış), şəbəkə (ağacdan və alabəzək şüşələrdən düzəldilmiş təsvir). Dekorativ tətbiqi sənətə el arasında “xalq sənəti” də deyilir. Bu sənətin xalçaşılıq, batika (kəlağayı),qobelen,dulusçuluq (keramika), toxuma və bədii tikmə, zərgərlik, bədii şüşə, bədii oyma (ağac,metal,daş,sümük üzərində oyma) və digər növləri vardır. Dekorativ tətbiqi sənət həmçinin bədii sənətin müxtəlif növlərini əhatə edir. Onların arasında döymə sənəti və zərgərlik, metal üzərində işləmələr, agac, daş və sümük üzərində oyma naxış, xalçaçılıq, hörmə sənəti, ornamental toxuculuq və basmanaxış, toxuma, bədii tikmələr və bir çox digərlərini göstərə bilərik. Azərbaycan xalq tətbiqi sənəti və onun bir qolu olan xalçaçılıq xalqın milli mədəniyyəti tarixində özünəməxsus yer tutur.
Xalq sənətlərinin ən geniş yayılmış növü Azərbaycan xalqının məişətində özünə möhkəm yer tutmuş və az qala xalqın rəmzinə çevrilmiş xalça sənətidir. Müxtəlif naxış elementləri və təsvirlərlə bəzədilən xovlu və xovsuz xalçalar dəyələrin, çadırların, alaçıqların, habelə yaşayış evlərinin və digər binaların divar bəzəklərində, döşənməsində istifadə edilir, eyni zamanda yüksək estetik əhəmiyyət kəsb edir. Azərbaycan xalçaları öz texniki xüsusiyyətlərinə görə xovlu və xovsuz olurlar. Xovsuz xalçalar toxuculuq sənətinin ən erkən dövrünə təsadüf edir. Azərbaycan xalça sənəti öz yüksək bədii texniki keyfiyyətinə, xovsuz toxunuşunun müxtəlifliyinə görə fərqlənir.. Xovsuz xalçaların, ümumiyyətlə xalça sənətinin yaranmasının əsasını onların ilk sadə nümunələri olan həsir, çətən, buriya təşkil edir. Xovsuz xalçalar öz toxuma üsuluna, kompozisiya quruluşuna, ornament zənginliyinə və rəng koloritinə görə bir-birindən fərqlənən 8 növə bölünür: palas, cecim, ladı, kilim, şəddə, vərni, zili, sumax
Azərbaycan xalça sənətinin elm sahəsi kimi öyrənilməsi və professional rəssamların yaradıcılığında müasir inkişafı Azərbaycanın xalq rəssamı Lətif Kərimovun (1906-1991) adı ilə bağlıdır. Şərq, o cümlədən Azərbaycan xalçası və dekorativ - tətbiqi sənətinin mahir bilicisi, görkəmli ornamentalist - rəssam, tədqiqatçı alim kimi tanınan L.Kərimov uzun illər Azərbaycan xalçalarını tədqiq etmiş, Azərbaycan dekorativ sənətini yeni ornamentlərlə zənginləşdirmiş, ənənəvi bəzək elementləri əsasında yeni dekorativ motivlər yaratmışdır. L.Kərimovun eskizləri əsasında toxunmuş "Əfşan" (1932), "Qonaqkənd" (1939), "Ləçəktürünc" (1952), "Şuşa" (1953), "Göygöl" (1958), "Qarabağ" (1960), "İslimi" "Əcəmi" (1976) və s. ornamental və portret xalçalar ornament elementlərinin uyarlığı, kompozisiya bitkinliyi, rəsmlərinin zərifliyi və ifadəliliyi, zəngin koloritinə görə xalçaçılıq sənətinin qiymətli nümunələrindəndir. Azərbaycan xalçaları sənət sahəsi kimi həm coğrafi mövqeyinə, həm də naxış, kompozisiya, rəng həlli və texniki xüsusiyyətlərinə görə şərti olaraq 7 xalçaçılıq məktəbi: Quba, Bakı, yaxud Abşeron, Şirvan, Gəncə, Qazax, Qarabağ,Təbriz xalçaçılıq məktəbinə bölünür.
Azərbaycan xalqının qədim ənənələrə malik kəlağayı sənətinin çağdaş varisi batikadır. Batika qədim sənət növü olub,kəlağayı mənasını verir. Kəlağayı ipək sapdan toxunmuş dördkünc formalı qadın baş ortüyüdür. Azərbaycanın qərb zonasında buna “çarqat”da deyilir. Azərbaycanda kəlağayı istehsalınin qədim tarixi vardır. Şəki və Basqal kəlağayıları sırasında “Şah buta”, “Saya buta”, “Xırda buta “çeşidlərindən daha çox istifadə olunub. “Heyratı”, “Soğanı”, ”İstiotu”, “Albuxarı”, “Abi”, “Yeləni” adlı əlvan kəlağayılar böyuk şöhrət qazanmışdır.
Qobelen hiss və duyğuların sənətidir, düşüncə tərzidir. Qobelen dünyada geniş yayılmış, Azərbaycanda isə qədim xalq mədəniyyətinə aid xalça sənətidir. Qobelenin hazırlanma texnikasının əsasını öncədən çəkilmiş eskiz, fikir, ideya təşkil edir.
Qobelen xovsuz xalça növü olub, hazırda dekorativ sənət kimi tanınmaqdadır. Sənəti dekorativ edib, onu adi xalıdan fərqləndirən əsas cəhət isə qobelen üzərində insan duyğularının, hisslərinin cəmləşdiyi süjetli kompozisiyanın məna və məzmunla ipə-sapa koçürülməsidir. Qobelen sənəti ilə məşğul olan ilk növbədə yaradıcı rəssam olmalıdır. Rəssamın qobelen toxuması üçün ona ilk lazım olan avadanlıq, material düşüncə və xəyallarıdır.
Boyama üçün bitki mənşəli boyayıcılardan istifadə olunur. Azərbaycanın bədii tikmələrində ən çox işlədilən bitki motivləri qızılgül, nərgiz, qərənfil, lalə, zanbaq, meyvə ağaclarının yarpaqları, nar, heyva, alça çiçəkləri elecə də sünbül və müxtəlif formalı yarpaqlardı. Bədii tikmələrdə əsasən quşların təsvirinə ustunluk verilir. Bədii tikmə növündən ən geniş yayılmış forması piləktikmədir.
Bədii şüşə dekorativ əşyaların, vitrajların interyerdə oz əksini tapmasıdır. Təsviri sənətin qədim nümunələri arasında Mingəçevirdən, Şamaxıdan tapılmış müxtəlif tipli və formalı bədii şüşə məmulatı nümunələri Azərbaycanda şüşə istehsalının da movcud olduğunu göstərir.
Bədii oyma - dekorativ sənətin ən qədim və ən geniş yayilmış növlərindən biridir. Daş, ağac, sümük və başqa materiallar üzərində işlənir. Azərbaycanın ən qədim yaşayış məskənlərindən olan (Qobustan, Gəmiqaya və.s.) daş üzərində oymaları bədii oyma sənətinin ilkin nümunələri kimi göstərmək olar.
Dekorativ-tətbiqi incəsənətin bir növü olan bədii tikmələrin tarixi çox qədimdir. Azərbaycan tikmə sənətinin təsvir vasitəsi olduqca zəngin və rəngarəngdir. Buraya müxtəlif növ sap, parça, muncuq, pilək və digər bədii materiallar daxildir.
Milli tikmə sənətinin təsvir vasitəsi olduqca zəngin və rəngarəngdir. Buraya müxtəlif növ sap, parça, muncuq, pilək və digər bədii materiallar daxildir. Tikmə sənətində ən çox rəngli ipək saplardan istifadə olunmaqla yanaşı, qızıl və gümüş tellərdən, ağac qabığı və fil sümüyündən hazırlanmış lövhəciklərdən, metal piləklərdən, hətta qiymətli daş-qaşlardan da geniş istifadə edilirdi.
Azərbaycan tikmələri işlənmə üsuluna görə bir çox növə bölünür: təkəlduz, güləbətin, saya, piləkli, cülmə, muncuqlu, qurama, oturtma. Təkəlduz orta əsrlərdə Şəki şəhərində geniş yayılmışdı və bu bu tikmə növündə naxışlar “gəzmə” və ya “doldurma” üsulu ilə salınırdı. Təkəlduzçular əsasən yerli və ya xaricdə istehsal olunan qırmızı, qara və tünd göy rəngli məxmər və mahuddan istifadə edirdilər. Təkəlduz sənətinin ilk nümunələrinə hələ Sasanilər dövründən rast gəlirik. Get-gedə o təkmilləşərək bir xalq sənəti kimi özünə yer tutur və məişətdə ən çox işlənən tikmə sənətinə çevrilir. Bu sənətin inkişafı yun, ipək kimi xammalın, həmçinin təbii rənglərin Azərbaycanda istehsal olunması ilə sıx bağlıdır. “Təkəlduz” hərfi mənada “təkəllə düz” mənasını verir. Avropa dillərində bu tikmə növünə “zəncirli naxış” deyilir.
Tikmə sənətinin geniş yayılmış növlərindən biri də güləbətindir. Güləbətin əsasən qızılı və gümüşü saplardan istifadə edilməklə işlənilir. Güləbətin tikmə üçün yerlik adətən tirmə parçalardır. Azərbaycanın bir çox şəhərlərində, xüsusilə də Təbriz, Bakı, Şamaxı və Naxçıvanda bu sənət növü inkişaf etmişdir. Ən qiymətli güləbətin tikmələri Şamaxı sənətkarlarının tikmələri hesab edilir. Güləbətin adətən arxalıq, araqçın, çəpkən kimi bəzi geyimlərin, saatqabı, daraqqabı və başqa məişət əşyalarının üzərində işlənirdi. Saya tikmələr üzərindəki bəzəklərinə görə bir-birindən fərqlənirlər; süjetli kompozisiyalı, nəbati və həndəsi ornamentli və s. Bunlardan biri muzeyin fondunda saxlanılan kiçik ölçülü saya dəsmaldır. Bu tikmə Mirzəyeva Peykər Mürsəl qızı tərəfindən 1958-59-cu illərdə tikilmişdir. Milli İncəsənət Muzeyində piləkli tikmə növünə aid nümunələr də xüsusi yer tutur. Bu növ tikmələr əsasən böyük və kiçikölçülü taxça və pəncərələr üçün düzəldilmiş pərdələrin üzərində işlənirdi. Hazırda muzeyin ekspozisiyasında nümayiş etdirilən XIX əsrə aid (Şamaxı bölgəsi) piləkli pərdə belə nümunələrdəndir. Muncuqlu tikmələrdə çox xırda və rəngli muncuqlardan istifadə edilir. Muncuqlar xüsusi saplarla düzülür, sonra isə pul kisəsinin, daraqqabının və s. kiçik torbaların üzərinə tikilib bərkidilir. Belə tikmə növünə biz görkəmli klassik şairə xanimimiz Xurşudbanu Natəvanın əl işlərindən ona məxsus olan pul kisəsi nümunələrində rast gəlirik.
Tikmə elə bir sənət növüdür ki, onunla həm sadə camaat, həm də zəngin təbəqəyə məxsus insanlar məşğul olurdu. XIX əsrdə yaşamış Azərbaycan şairəsi Xan qızı Natəvan gözəl şeirlərlə yanaşı, zərif tikmələrin də müəllifidir. Azərbaycan bədii tikmələrində ən çox qızılgül, nərgiz, qərənfil, lalə, zanbaq, nar, heyva, alça çiçəkləri, sünbül, müxtəlif formalı yarpaqlar, və digər motivlərə yer verilirdi. Eyni zamanda bədii tikmələrdə aşağıdakı quşları: bülbül, tovuz quşu, göyərçin, tutu quşu, hophop (şanapipik), sərçə, qırqovul, bildirçin, kəklik və digərlərini təsvir etməyi sevirdilər. Bədii tikmələrdə tez - tez rast gəlinən cüt quş təsvirləri dekorativ – tətbiqi incəsənət məmulatlarında ən qədim və sevilən motivdir. Bu gün də Azərbaycanda bədii tikmə məktəbi qorunub saxlanılır.
Təsviri sənət tarixində ilk dəfə 2007, 2009 , 2011 , 2013 və 2015 -ci illərdə İtaliyada keçirilən Ümumdünya təsviri sənət sərgisində Azərbaycan pavilyonu təşkil edilmiş , Azərbaycan rəssamlarının əsərləri nümayiş etdirilmişdi. 2009 və 2011 -ci illərdə ilk dəfə olaraq Respublikanın bütün şəhər və rayonlarını əhatə edən “Ümum Respublika dekorativ tətbiqi sənət “ festivalı keçirilmiş ,festivalın yekun sərgisi Bakıda təşkil olunmuşdur. Azərbaycan Xalça Muzeyində 2019 -cu ilin fevral ayında “Azərbaycanın mədəni sərvəti” layihəsi çərçivəsində naxışlı çətən toxuma texnologiyası üzrə mühazirə və ustad dərsləri keçirilib. Ustad dərslərinin keçirilməsində məqsəd unudulmaqda olan texnologiyaların nəsildən - nəsilə ötürülməsinə şərait yaratmaqdır. Dərslər YUNESKO üzrə Azərbaycan Milli Komissiyası və Xalça Muzeyinin birgə təşkilatçılığı ilə reallaşmışdır. Parça tikmə və milli geyimlərin bərpası “Azərbaycanın mədəni sərvəti” layihəsinin bir proqramıdır. Proqramın məqsədi bu sahə üzrə yeni kadrların yetişdirilməsi və muzeydə müasir, beynəlxalq standartlara cavab verən bərpa mərkəzinin yaradılmasıdır.
Azərbaycanda dekorativ-tətbiqi sənət növlərinin istehsalı o qedər geniş vüsət tapmışdır ki, ölkəmizdə ilk dəfə olaraq yeni formalaşmış auksion ənənəsinin əsasının qoyulmasına səbəb olmuşdur.
Tövsiyə olunan ədəbiyyat siyahısı və internet resursları:
1.Tağıyev R.C Azərbaycan dekorativ tətbiqi sənəti
Bakı, “Elm” 1986
2.Əliyeva G. Azərbaycan bədii parça və tikmələri
Bakı , “Elm” 1990
3.Keримов Л.Г.»Азэрбайджанский ковер» Б.Гянджлик,1983
4.Rasim Efendi.Azərbaycan Dekorativ Tətbiqi Sənətləri. Bakı.İşıq 1976
Kəmalə Sürət qızı Şahverdiyeva
Mədəniyyət üzrə Elmi-Metodiki və
İxtisasartırma Mərkəzinin metodisti
Oxunub: 12781
Əlavə olunub: 08.04.2020 15:28