Sasanilər dövründə (III-VII əsrlər) Azərbaycanda xalça sənəti daha da inkişaf yolu keçmiş, ipək, qızıl və gümüş saplardan toxunmuş, qiymətli daşlarla bəzədilmiş xalçaların istehsalı XVI-XVII əsrlərdə ənənə xarakteri almışdır.

Azərbaycanda toxunulmuş xalça və kilimlər bir çox tarixi kitablarda, klassik ədəbiyyatda, folklorda, hətta “Kitabi Dədə Qorqud” dastanında əks etdirilir.

Azərbaycan xalçaları sənət sahəsi kimi həm coğrafi mövqeyinə, həm də naxış, kompozisiya, rəng həlli və texniki xüsusiyyətlərinə görə 7 xalçaçılıq məktəbinə bölünür. Bunlar Quba, Bakı, Şirvan, Gəncə, Qazax, Qarabağ, Təbriz məktəbləridir.

Azərbaycan xalçaları daim xarici ölkələrdə təşkil olunan sərgilərdə yüksək yerlər tutub, qızıl və gümüş medallara layiq görülüb. 2010-cu ildə Azərbaycanın xalçaçılığı sənəti YUNESKO-nun "Qeyri-maddi mədəni irsin Reprezentativ siyahısı"na daxil edilib.