“Bir abidə - bir könüllü” layihəsinin növbəti ünvanı XIII - XIV əsrlərdə tikilən, Şamaxı şəhərində yerləşən və xalq arasında "Pir Mərdəkan" adı ilə tanınan xanəgah kompleksidir.

Kompleksə türbə, xanəgah binası və kiçik yardımçı binalar daxildir. Vaxtilə Şamaxı-Ərdəbil karvan yolunun üstündə yerləşən bu abidə həm ticarət, həm də ziyarət əhəmiyyəti daşımışdır.

Xalq arasında "Pir Mərdəkan" adı ilə tanınan xanəgah kompleksinin yalnız türbə binası dövrümüzə qədər salamat qalmışdır. Onun ətrafında isə məscid, hücrələr, karvansara və digər tikililərin qalıqları aşkarlanmışdır. Bəzi məlumatlara görə öz dövrünün görkəmli üləma alimlərindən olan Seyid Mərdəkaninin qəbiri buradadır.