Tədqiqatçıların fikrincə bənd adlı bu düzənliklərdə at çapmaq çətin və olduqca təhlükəli imiş, bu oyun vasitəsilə mahir atlıların kim olduğu məlum olurdu. Oyunun qaydalarına əsasən oyunçu atı yorğa və yaxud çaparaq sürür, atın çaparağında çuxasını, arxalığını, çarıqlarını, kəmər və xəncərini bir-bir çıxararaq yerə atır.

Müəyyən məsafə qət etdikdən sonra atı cəld geri döndərib təkrar getdiyi yolu geri qayıdır. Oyunçu atın cilovunu yığmadan sıra ilə yerə atdığı əşyaları yerdən götürüb geyiləni geyir, bağlananı isə bağlayır. Bu minvalla əməliyyatı cəld şəkildə yerinə yetirən atlı oyunun qalib sayılır.